Helstu fréttir dagsins af innlendum og erlendum vettvangi. Alla daga, árið um kring.

Góð ráð og æfingar sem tilvalið er að gera heima. Íris Rut Garðarsdóttir sjúkraþjálfari hefur umsjón með leikfiminni.

Lifandi og fjölbreyttur þáttur um fréttir, menningu og dægurmál. Helstu fréttir dagsins eru krufðar og ljósi varpað á litríkt mannlíf um land allt. Umsjón: Baldvin Þór Bergsson, Bergsteinn Sigurðsson, Guðrún Sóley Gestsdóttir, Óðinn Svan Óðinsson, Urður Örlygsdóttir og Viktoría Hermannsdóttir. Borgarráð samþykkti í dag breytingar á leikskólarekstri sveitarfélagsins. Breytingarnar byggja að hluta á fyrirkomulagi Kópavogsbæjar, borgarfulltrúarnir Líf Magneudóttir og Einar Þorsteinsson ræða tillögurnar. Frænkurnar Dagmar Helga Helgadóttir og Valgerður Rakel Rúnarsdóttir sömdu lagið Riddari kærleikans, sem bæði varð að slagara í flutningi GDRN og línu í nýársávarpi forseta Íslands.

Spurningakeppni sveitarfélaga. Umsjónarmenn eru Sigmar Guðmundsson og Þóra Arnórsdóttir. Spurningahöfundur og dómari er Stefán Pálsson. Dagskrárgerð: Helgi Jóhannesson.

Karl Ágúst, Pálmi, Sigurður og Örn bregða á leik sprellfjörugir að vanda í vinsælasta sjónvarpsþætti á Íslandi. Stjórn upptöku: Björn Emilsson.

Útvarpsmaðurinn Andri Freyr Viðarsson fór á flakk um Ísland sumarið 2011 ásamt bolabítnum Tómasi á forláta húsbíl, Litla kút að nafni. Saman keyrðu vinirnir krókaleiðir kringum landið í leit að því skrýtna og skemmtilega. Hvar er Valdi koppasali í dag? Hefur Palli í Hlíð í raun og veru skotið og drepið allar tegundir af spendýrum á Íslandi? Er lyklakippusafn Grétu á Reyðarfirði á heimsmælikvarða? Hver er meðalgreindarvísitalan á Bíladögum á Akureyri? Er hægt að keyra húsbíl yfir jökulsá? Við þessum og fleiri spurningum fást nú loks svör því Andri fer sannarlega ótroðnar slóðir á ferðalagi sínu um landshlutana sex. Við hefjum leikinn í heimabæ Andra, Reyðarfirði. Þar hefur hún Gréta Friðriksdóttir komið sér upp mjög myndarlegu lyklakippusafni, svo vægt sé tekið til orða. Á Eskifirði fær Andri að prófa að skjóta af einu haglaskammbyssunni á landinu, í boði stórskyttunar Palla í Hlíð. Hann er líklega frægastur fyrir að geta skotið vængina af fiðrildi á 50 metra færi. Andri og Tómas fara í pílagrímsför til Vopnafjarðar, fæðingarbæ Lindu P. og finna í leiðinni ótrúlega góða sveitasundlaug í Selárdal. Á Eiðum kíkja Andri og Tómas í kaffi til Bjartmars Guðlaugssonar og telja í eitt eða tvo lög eftir meistarann sjálfann.

Þáttur sem er löngu orðinn ómissandi í bókmenntaumræðunni í landinu. Egill og bókelskir félagar hans fjalla sem fyrr um forvitnilegar bækur af ýmsum toga og úr öllum áttum. Umsjón: Egill Helgason. Dagskrárgerð: Jón Víðir Hauksson. Í Kilju vikunnar förum við norður í Svarfaðardal og hittum Þórarin Eldjárn á slóðum ættar sinnar. Þórarinn hefur nýverið sent frá sér tvö rit, ljóðabókina Jarðtengd norðurljós og Dreymt bert sem er safn örsagna. Soffía Bjarnadóttir ræðir um skáldævibókina Áður en ég brjálast sem hefur vakið mikla athygli. Skylduskil á prentmáli til bókasafna eru býsna mikilvægur þáttur í ritmenningu en stundum eru nokkur vanhöld á þeim - Kristjana Mjöll Jónsdóttir Hjörvar leiðir okkur í allan sannleik um þetta efni. Páll Björnsson sagnfræðingur segir okkur frá bók sinni Dagur þjóðar en hún rekur sögu þjóðhátíðardagsins 17. júní og hvernig hann varð að hefð meðal þjóðarinnar. Gagnrýnendur þáttarins fjalla um Þú sem ert á jörðu eftir Nínu Ólafsdóttur, Hefnd Diddu Morthens eftir Sigríði Pétursdóttur og Dauðann og stúlkuna eftir Guillaume Musso.

Þáttur um mannlífið í landinu. Landinn leitar uppi skemmtilegt fólk í bæjum og sveitum og skoðar áhugaverða staði landshorna á milli. Ritstjóri er Gísli Einarsson. Aðrir umsjónarmenn: Edda Sif Pálsdóttir, Þórdís Claessen, Hafsteinn Vilhelmsson, Amanda Guðrún Bjarnadóttir og Andri Freyr Viðarsson. Dagskrárgerð: Jóhannes Jónsson, Elvar Örn Egilsson, Hjalti Stefánsson, Benedikt Nikulás Anes Ketilsson og Björgvin Kolbeinsson. Í Landanum í kvöld kynnumst við samtakamætti fólksins í Suðursveit, við fylgjumst með búsetu Tjalda í vegköntum, við við kynnum okkur veröld skálavarðar í Skálavík og berjum glóandi járn í ísfirskri eldsmiðju.

Ofurhetjur þurfa líka að setjast á skólabekk. Þessir óvenjulegu fyrstu bekkingar vekja mikla kátínu í þessum norsku ofurhetjuþáttum.

Finnlands-sænskir þættir þar sem krakkar segja frá áhugamálum sínum.

Bresk sjónvarpsþáttaröð úr heimi vísindaskáldskapar fyrir unglinga. Árið 1997 hurfu fjórir krakkar úr Silfruskógi. Tuttugu og þremur árum seinna ákveður strákur einn að komast að því hvað í raun og veru gerðist í skóginum þennan örlagaríka dag. Hlutirnir fara ekki samkvæmt áætlun þegar Glen reynir að fjarskipta sjálfum sér í gegnum orkugjafann.

Hildur og Alexander vita ekkert skemmtilegra en einmitt að grúska í geymslunni hennar ömmu. Þar er aldeilis nóg af dóti! Þau láta ímyndunaraflið ráða og búa til eitthvað nýtt úr gömlum hlutum á verkstæðinu. Umsjón: Hildur Eva Höskuldsdóttir og Alexander Ottó Þorleifsson Dagskrárgerð: Eva Rún Þorgeirsdóttir og Elvar Egilsson Amma á afmæli og Hildi og Alexander langar að gefa henni afmælisgjöf. En hvað á að gefa ömmu sem á allt nú þegar? Þau fá þá snilldarhugmynd að búa til myndaramma úr gömlum glugga.

Íslensk tónlistarmyndbönd. Lag: Vegbúi Flytendur: KK og Bríet Höfundur: KK

Breskir gamanþættir frá 2022 um hina óviðjafnanlegu Jessop-fjölskyldu. Daglegt líf þeirra er heldur óreiðukennt og yngsti sonurinn Sam festir það allt á filmu. Aðalhlutverk: Katherine Parkinson, Jim Howick og Freya Parks. Handritshöfundur: Tom Basden.

Helstu fréttir dagsins af innlendum og erlendum vettvangi. Alla daga, árið um kring.

Íþróttafréttir.

Veðurfréttir.

Breskir gamanþættir frá 2023 byggðir á minningum grínistans Alans Carrs um uppvaxtarárin í Northampton á níunda áratugnum. Aðalhlutverk: Alan Carr, Oliver Savell og Shaun Dooley.

Gísli Marteinn tekur á móti góðum gestum á föstudagskvöldum í vetur og fer með þeim yfir helstu atburði vikunnar í stjórnmálum, menningu og mannlífi. Persónur og leikendur koma í spjall og brakandi fersk tónlistaratriði koma landsmönnum í helgarstemninguna. Stjórn útsendingar: Ragnar Eyþórsson.

Breskur sakamálaþáttur um hinn slungna séra Brown sem er ekki bara kaþólskur prestur heldur leysir glæpsamleg mál á milli kirkjuathafna. Aðalhlutverk: Mark Williams.

Bresk sakamálamynd byggð á sögu eftir Ann Cleeves um Veru Stanhope rannsóknarlögreglukonu á Norðymbralandi. Með aðalhlutverk fara Brenda Blethyn, David Leon og Jon Morrison. Myndin er ekki við hæfi barna yngri en 12 ára.

Bandarísk kvikmynd frá 2014 með Julianne Moore í aðalhlutverki. Alice er þekktur og mikilsvirtur prófessor í málvísindum sem uppgötvar að hún er komin með alzheimersjúkdóminn. Hún þarf, ásamt eiginmanni sínum og þremur börnum, að takast á við vaxandi afleiðingar sjúkdómsins. Aðalhlutverk: Julianne Moore, Alec Baldwin og Kristen Stewart. Leikstjórar: Richard Glatzer og Wash Westmoreland.